كتير بلاقي نفسي بفكر بس باللهجه الشامي وده غالبا لما بيكون ليه علاقه بالحنين والشوق..كلمه اشتئتلك معبرة اوي وبتوفر حكي عن كلمه وحشتني
وساعات بلافي نفسي بفكر بالانجليزي مع اني مش قوي فيه وده غالبا لما بفكر بحاجه مع صحابي او علاقتي بيهم
وكتير اوي بحس ان الاصوات واللهجات واللغات كلها واقفه مش قاره تعبر عن الي نفسك تقوله.. بيبقي نفسك تعبر وتشرح ولكن مافيش حاجه بتطلع منك..مشكله مواليد السرطان حساسيتهم المفرطه واخلاصهم في الحب.. كتير بحب ناس بس انا الحب عندي درجات والي بيوصل انه يبقي قريب مني فعلا ده بيبقي زي مركز اتزان ليا وفي 2016 انا خسرت كتير..وبعدت عن ناس كتيره اوي
كنت في راس السنه في اسوان وفي اول ساعه في السنه دي ضاع موبايلي وكله استغرب بعيط ليه..انا كنت بعيط لاني بؤمن بالرسايل دي وعرفت ساعتها ان هتبقي سنه هفقد فيها ناس وحاجات كتيره..وبالوقت كل شويه حد يموت..حد يختفي..مشاكل في كل اتجاه..كنت متوقع كل ده
من يومين كنت علي تطبيق للتعارف بين المثليين وكلمت حد ونادرا ما بيتم محادثات طويله علي التطبيقات دي وتكون جديه وكانت نهايتها انه قالي ان عقلي عقل طفل عنده 21 سنه..كان من ضمن كلامنا لما قلتله اني مش مؤمن بالعلاقات بين المثليين في الدول العربيه بسبب ان المجتمع اقوي وبالوقت هتثير حواليك علامات استفهام مش هتعرف ترد عليها ممكن تدمر حياتك واني مؤمن بالصداقه اكتر فكان رده انه مش مؤمن بعلاقه صداقه اساسها توجهك الجنسي بس وان ده الي يجمع بينكم ولولاه مكنتوش هتبقوا صحاب ولا هتعرفوا بعض..انا رديت عليه بكلام ان الصداقه مش هتتم الا مع حد بينكم اهتمامات مشتركه بغض النظر عن توجهك الجنسي
بعدين قعدت افكر في كلامة وايقنت انه صحيح وان معظم العلاقات بتنتهي بسهوله ومش بترجع لان الرابط بينا هش اوي..الرابط هو توجهنا الجنسي واكاونتات الفيسبوك ومحادثات الواتساب ومهما العلاقه اتطورت ونضجت بسهوله بتخلص كان شيئ لم يكن ويترجعوا اغراب تاني بسهوله
الحقيقة المره ان الكلام والحكي مش بيريح ولا بيهون بس بيفتح في وجع وبيفكرك بحاجات بتهرب منها..بتهرب من حقيقه ان كل شيئ بيختفي..والضحك والذكريات بتختفي..كل شيئ بتقدر تمسحه..ممكن تحظر حد من الفيس وينتهي من حياتك ولكن للاسف مبقدرش احظر حد من دماغي فبيبقي خروجهم دايما مصدر وجع
